原标题：“戥穿石”系乜东东
□ 伍小愉
喺广州话里面，伴郎同一班兄弟被称之为“戥穿石”，又叫做“邓穿石”、“幐猪石”和“艠砖石”。点解有咁古怪嘅名称呢？系有段古嘅。
广州人结婚当日，新郎新娘各有一位兄弟和姊妹全程陪伴喺身边，直至婚宴结束，嗰位兄弟就叫“邓穿石”。“邓穿石”通常系新郎哥嘅好朋友，又或者系亲戚来做，其中一个最熟嘅就做伴郎。呢班人帮手上下打点，饮完酒后就冇用喇，所以畀人比喻做“戥穿石”。
点解“邓穿石”又变成“戥穿石”呢？传说本来叫“戥猪石”，古时候有个姓邓名穿嘅人，挑猪上街卖，但只有一头猪，冇办法平衡，于是佢用石头来作平行，之后就被人睇见，就说佢蠢，后来叫佢做邓穿石。
因为戥读邓，穿同村同音，所以亦都有人写做“邓村石”。“邓穿石”其实系“邓猪石”，因为“邓猪石”太难听，有被贬嘅意思，所以讲得含蓄点，叫“邓穿石”。又或者叫“邓九石(邓狗石)”。
点解“戥猪石”又变成“幐猪石”呢？据考证，“戥猪石”系由“幐猪石”而来。幐本意系古代人佩带嘅香囊，《说文解字注》：两头有物谓之幐担，所以幐有负荷嘅意思，引申为使平衡；古人担猪为方便平衡担抬所以用一石幐匀，当猪运完后石头就唔用咯，后来有秤后就用戥字代替，戥系小型嘅秤，亦有戥匀之意，用猪字对新郎比较不尊重，因为系穿住块石戥住，就用戥穿石来比喻伴郎及一帮兄弟。
猪仔拎去市集卖，都会用担挑。用担竿“担”(粤语中“担”即挑)东西，两人“担”嘅，东西放中间就可以；一人“担”嘅，头尾嘅东西重量须平衡，以前每逢墟日，农民担猪仔或中猪到墟上卖，担竿嘅另一头须捆一块重量相当嘅石牯以作平衡，凑成担子。那块石牯称“戥猪石”，戥者，等量也。喺墟上把猪卖咗，戥猪石就毫无用处，被弃于路旁。伴郎也系一样，婚礼一完，佢嘅作用也就完咯，所以粤人称伴郎为“戥猪石”，久而久之音讹为“戥穿石”。
点解又叫“艠砖石”呢？“艠砖石”系船民用来压船舱嘅。渔船准备出海时，由于船身比较轻，故要放些石头压舱以稳定船身。